• Бугунги сана: Payshanba, Dekabr 14, 2017

Хайрулла Ҳамидов: «Барселона» ва инқироз»

Бугунги «Барселона»ни Майк Тайсонга ўхшатаман. Тайсонни ҳеч ким енгишни ўйламасди – бунинг имкони йўқ эди чунки, фақатгина биринчи раундда туриб бериш ҳақида гап борарди бошқаларда. Майк шу қадар замон боксчиларидан илгарилаб кетгандики, у фақат ўзига енгилсагина, рақиби олтин камарлик бўларди. Ҳа, бугунги «Барселона»нинг ҳақиқий чизмаси шу!

Олдиндан айтиб қўяй, мен «Реал»нинг ашаддий мухлисиман. Унинг ўйинларини беҳаяжон кузата олмайман, зўрға ўтираман. Шундай бўлса-да, битта ҳақиқатдан кўзни юмолмайман;

… «Барселона» шундай буюк жамоаки, унинг мағлубияти кўпчиликни шокка тушириб қўяди, клуб эпохаси тугади, деб юборади унинг мағлубиятини кутган шаҳловчилар.

… «Барселона» шу қадар ғалаба деган сўзга омухта бўлиб кетганки, унга енгилиш мутлақо мумкин эмас! Енгилдими, тамом, уни хоҳлаганча танқид қилишга рухсат бор!

… Бу жамоа йигирма биринчи асрда ўзига ўзи шундай «планка» қўйиб улгурдики, унга бошқалар ета олмаса-да, ўзи доимо ўша баландликдан юқорироқ сакраши керак, даҳшат-а?! Биргина жиддий мағлубият билан бош мураббийга чиқиш эшиклари кўрсатиладиган даражага чиқиб улгурди ўзи. Жамоа президентининг хоҳиши билан алмаштириладиган ҳолат эмас бу, мухлислару мутахассисларнинг фикрига кўра…

Ҳа, Энрике енгилди, енгилганда ҳам рақибига ҳар томонлама енгилди. ПСЖ бу ўйинда испаниялик юлдузларни том маънода еб қўйди. Лекин мен барибир Уткинга ўхшаб Каталония суперклубидан инқироз сўзини ясамоқчи эмасман. Василийга ўхшаб бу баҳсни 20 йил олдинги «Ноу Камп»да Шевченко ва жамоадошлари томонидан уюштирилган шоуга менгзай олмайман. Тўғри тушунинглар, бугунги «Барселона» бунга ижозат бермайди.

Рус шарҳловчиси мени тўғри тушунсинки, худди унга ўхшаб мен ҳам мозий саҳифаларини безаб турган ўша ўйинни диққат билан томоша қилганман. Ўшанда «Динамо» (Киев) яна ўн марта ўша «Барса» билан ўйнаса, ўновида ҳам ғалаба қозонарди. Бугунги ПСЖ вариантида мутлақ тескариси. Ўнтадан битта – ўхшаб қоладиган ғалабани илиб кетди Париж.

Бу сўзларни ишонч билан айтишимга яна бир сабаб бор – бугунги каталонияликлар ҳақида яқин кунлар ичида ҳам ҳеч ким ортиқча гап айтмаётганди. Ҳар бир жамоа бошида мавжуд бўлган таркиб борасидаги муаммолар ё футболчиларнинг ўзгариб турадиган кайфиятлари «Барселона»ни инқироз сўзига синонимдош қилиб қўймайди, ахир.

Ҳамма танқидларга қаранг, ўйиндан кейин айтиляпти. Танқидлар одатда ютқазилган баҳсдан сўнг бўлади-да, дерсиз?! Йўқ, гап бунда эмас. Гап олдинги даъволарнинг оз бўлса ҳам бугунгиларига мос тушишида. Оддий мисол – Бабаян бошчилигидаги Ўзбекистон терма жамоаси. Бу жамоа аввалги ўйинларида тинмай ғалабалар қозонди. Шунда ҳам кўпчилик Бабаян ўйинини танқид остига олди. Мағлубиятга учралгандан кейин сел бўлиб ёғилган танқидлар ўша, ғалабали онлардаги ўйинларда айтилган гапларнинг давоми эди, холос. Бугунги «Барселона» ҳақида айтилаётган «даври тугади», «инқироз» ва шунга ўхшаш сўзлар менинг наздимда таги йўқ, асоссиз сўзлар.

Бугунги «Барса»нинг бошида турган Энрикени ҳам, унинг таркибида ўйнаётган юлдузларни ҳам танқид ботқоғига ботириб ташламаслигимга яна битта сабаб бор – Париждаги ўйин ҳар бир жамоа бошида бўлиб турадиган, аммо негадир фақат «Барселона»га айб кўриладиган тасодифий мағлубиятлардан бири бўлганидадир. Бу ҳақда бошида айтиб ўтдим, яна тўхталмайман. Фақат биргина жиҳатга эътибор қаратишингизни сўрайман – жавоб ўйинида бирор ким «Арсенал» ўз уйида тўртта жавобсиз гол уриб, «Бавария»ни мусобақадан чиқариб юборишига ишоняптими, йўғ-а, аммо «Ноу Камп»даги ўйиндан олдин Энрике матбуот анжуманидаги қитмир журналистга «уялиб қоласан ҳали» дея оляпти. Уткин хафа бўлмасину, бунақа гапларни йигирма йил олдинги «Барселона» мураббийи ҳам айта олмасди.

Хайрулла Ҳамидов,
Манба: «Maydon.uz»

Дўстларингиз билан улашинг:


  • Arbat Жавоб бериш
    10 oy олдин

    Gap youq Hayrulla Akaga, bularni maqolarni oqib kishi ma’za qiladi, maqola osmondan olinmagan, bu maqolani tagida juda ko’p mexnat va mashaqat yotipdi, izlanishlar. Haqiqatdan ham Hayrulla akani gaplariga qoshilishdan boshqa iloj yoq. Bir eslaylik 4 yil oldin Barselona ikki oyin natijasiga kora Bavariyadan 7 nol xisobida maglubiyatga uchradi. Lekin barselona osha maglubiyatlardan oziga togri hulosa chiqarib ikki yildan kegin yana taxtga qaytdi va yarim finalda kim san osha Bavariyani yer tishlatdi.

  • Сардор Жавоб бериш
    10 oy олдин

    Салом Хайрулла ака UZREPORT да Футбол ўйинларини шархласангиз жудда зўр бўларди

  • Акбар Жавоб бериш
    10 oy олдин

    Маколага гап йук . Бир пайтлардагидек фифа лойихасини уйлаб курсангиз яхши буларди . Сизни шархларингиз футбол мухлислари калбида доим айнан мен Реал Мадрид жамоаси мухлиси булишимга уша пайтдаги шархларингиз кизиктирган . Рахмат

Э-почтангиз ошкор қилинмайди. Тўлдирилиши шарт қаторлар * белгиси билан ажратилган.

Бу ерда HTML теглари ва аттрибутларидан фойдаланишингиз мумкин: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>