• Бугунги сана: Dushanba, Noyabr 20, 2017

“Мени яхши кўрмасаларинг, нега бола қилиб юрибсизлар?!”

Фарзанд – инсоннинг умр дарахти меваси. Бу меванинг ширинлиги эса уларнинг меҳр сувига қай даражада қонганлигига боғлиқ. Афсуски, бу ҳақиқатни аксарият ота-оналар ёддан чиқаришгандай… Тобора тезкорлашиб бораётган дунёда турли юмушлар билан овора бўлиб, ҳаммадан ҳам фарзандларига керак эканликларини унутишгандай…

Мени анчадан буён ўйлантираётган шу каби мулоҳазалар бир суҳбатдан сўнг янада қатъийлашди – дугонам оиласи ҳақида гапира туриб, тўрт яшар қизалоғининг уларга билдирган норозилигидан ҳайратланди: “Қизим кун бўйи “мен билан ўйнанг”, “бирга мультфильм кўрайлик”, деб хархаша қилди. Табиийки, мен уй ишларидан ортиб у билан ўйнай олмадим. Кеч тушгач, дадаси келди. Дадасига ҳам хархашаларини бошлади. Шунда турмуш ўртоғим чарчаганлигини айтиб, дам олгани кириб кетди. Юзлари жаҳлдан қизарган қизим эса овозининг борича: “Мени яхши кўрмасаларинг, нега бола қилиб юрибсизлар?! Бериб юборинглар бошқаларга, улар яхши кўриб, бола қилсин!” – деди-да, хонасига кириб кетди…”

Фарзандлар ота-оналаридан норози бўлишмоқда, балки бунга ҳақлидирлар ҳам. Чунки фақат дугонамгина эмас, бошқа кўпчилик ҳам фарзандларига вақт ажрата олмаяпти. Узундан-узоқ сериалларни кўришга, телефонда соатлаб гаплашишга, базму жамшидларда кўнгил очишга вақт топган ота-оналар фарзандлар тарбияси билан шуғулланиш, суҳбатлашиш, ўйинларига ҳамроҳ бўлишга эринадилар.

Тарбия учун 12 дақиқа

Руҳшуносларнинг таъкидлашича, юртимизда ота-оналар фарзандлари учун бир кундан 12 дақиқанигина (!) ажратар эканлар. Бу муддат ҳам овқат пайтидаги “таомни ундай егин”, “иссиқ кийин”, “мактабда тўполон қилма” каби гап-сўзларга сарфланади…

Фарзанд тарбияси учун 12 дақиқа кифоя қиладими? Болалар учун шугина муддатни ажратиш ноинсофлик эмасми? Бу ҳолда уларга одамийлик шартларини, одоб-ахлоқ намуналарини ким ўргатади?! Ким уларга меҳрнинг таъмини, самимийликнинг суратини, оилавий бахтнинг тафтини кўрсатади?!

Замондошим, бир ҳисоб-китоб қилиб кўринг-а, сиз фарзандингизга бир кунда қанча вақт ажратасиз? Ўз жавобингиздан кўнглингиз тўлармикан?!

Нигора Мирзаева

__________________________________

“Ирфон” тақвимидан олинди


Сайтимизнинг бошқа мақолалари билан ҳам танишиб чиқишни тавсия этамиз. Бизни «Facebook», «Twitter»даги саҳифаларимиз, шунингдек, «Telegram»даги расмий каналимиз орқали кузатиб боринг!

Калит сўзлар:

Дўстларингиз билан улашинг:


Э-почтангиз ошкор қилинмайди. Тўлдирилиши шарт қаторлар * белгиси билан ажратилган.

Бу ерда HTML теглари ва аттрибутларидан фойдаланишингиз мумкин: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>